Aurreko asteko garaipenaren ondoren moralez indarberrituta joan ziren Zurt Taberna ISBkoak Quiron Leioa aurkari zuzenaren kontra jokatzera. Psikikoki hobeto bai, baina fisikoki arazo dezenterekin. Berezi, Eider eta Maite Lizarazu baja izan ziren eta bai Itsaso eta baita Maite Zubizarreta ere giharretako arazoekin ibili ziren astean zehar. Hala ere, ilusio handia zuten neurketa horretan jarria Iraurgiko neskek, bizkaitarrei irabazi ezkero, lehen postua berreskuratzeko aukera izango zutelako eta gainera, denboraldia lau lehenen artean amaitzeko sekulako aurrerapausoa litzatekeelako. Kontua da, etxekoek gehiago asmatu zutela uztaira begira eta gainera epaileetako bat protagonista bihurtu zela gaizki ulertutako jokaldi batean Intza kaleratu eta gainontzeko taldekideak partidatik atera zituelako azken laurdenean.

Partidua ondo hasi zuten gipuzkoarrek. Barruko jokoan nagusi izan zitezkeela ikusita, zona barruan baloiak jarri eta puntuak eskuratzeari ekin zioten. Leioak jaurtitzaile oso onak dauzka kanpoko jokoan eta partidua parekaturik eramatea lortu zuen distantzia horretatik. Bi taldeak sekulako denboraldia egiten ari dira eta joko polita erakutsi diete euren zaleei. Bigarren laurdenean joko mota hori atera zuten batzuek eta besteek eta neurketako minuturik politenak ikusi ahal izan ziren. Batzuek kanpotik ikaragarri asmatuaz eta besteek zeukaten arma guztiekin eutsiz. Atsedenaldira bost puntu goitik iritsi ziren etxekoak.

Hirugarren laurdenetik aurrera etxekoak nagusitzen hasi ziren gutxika-gutxika. Nekea sumatzen hasi ziren gipuzkoarrak eta etxekoek berriz, baloia bikain mugitu zuten jaurtiketa aukera onena bilatu ahal izateko. Baita lortu ere. Hamar puntutik gora joan zen aldea, eta Zurtekoak kontziente izan ziren neurketa irabazterik ez zutela edukiko. Hori ikusita, bigarren helburu baten bila jo zuten: basketaberagea zaintzea. Azkoitian jokatutako neurketan Joseba Lizarralderen neskek 10 puntugatik irabazi zuten eta alde hori zaintzeko asmoz jokatu zituzten hurrengo minutuak. Gogor borrokatu zuten eta aldea murriztea lortu zuten. Gainera minutu askoan hamar puntutik bera ibili zen, baina orduan epaileek euren protagonismoa bilatu nahi izan zuten. Intzak kontraeraso bat amaitu eta amorru keinu bat gaizki ulertu eta kaleratu egin zuen. Arrazoiak ematerako orduan gainera gezurra bota zuen, kantxan gauza bat esan eta aktan beste bat jarri zuelako. Guzti honek bere onetik atera zuen taldea. Etxekoek aprobetxatu egin zuten eta 16 puntugatik irabazten amaitu zuten: 73 eta 57.

Horrelako kolpe batetik altxatzeko onena hurrengo neurketan garaipena lortzea. Horretan saiatuko dira Zurt Taberna ISBkoak. Fundación Ardoi talde nafarrak goi postuetara lotzea bilatu nahiko du, eta Iraurgikoek berriz, hauek beste kontrario zuzen bat ez bihurtzea.

Saskiratzaileak: (12-10/24-21/17-11/20-15)

QUIRON LEIOA: Gonzalez, Lekerika (2), Zugazaga, Tena (17), Rodriguez, Sgarduy (8), Vega (19), Garces, Torres (18), Garcia (4), Uncetabarrenechea (5), Azkue

ZURT TABERNA ISB: Garazi (14), Sara Zabaleta, Irati (7), Maite Zubizarreta (6), Intza Lizarazu (11), Maitane (2), Maite Galdos (5), Itsaso (15), Naroa